Við teljum að kosningarnar framundan séu ótrúlega mikilvægar fyrir framtíð Reykjavíkurborgar. Breytingar og áherslur nýs kjörtímabils verða að vera á grunni jafnaðarmennsku svo kerfið virki í þágu fólksins. Reykjavík er frábær borg og hér eru einhver mestu lífsgæði í samanburði við önnur Evrópulönd. Það er hvorki sjálfgefið né tilviljun. Það er afrakstur pólitískra ákvarðana, skýrrar framtíðarsýnar og samfélagsgilda jafnaðarfólks. Við í Samfylkingunni bjóðum upp á skýran valkost: norrænt velferðarsamfélag gegn einstaklingshyggju hinna. Jafnaðarstefnan er enda vörður velferðar í heimi vaxandi skautunar og innflutts menningarstríðs.

Samfylkingin vill að Reykjavík sé besti staðurinn á Íslandi til að búa á, vera barn og ala upp börn. Samfylkingin hefur lagt grunninn að stærstu innviðafjárfestingum sögunnar sem munu breyta ásýnd borgarinnar til frambúðar. Við erum með barnasáttmálann, samþykkta áætlun um stórfellda uppbyggingu samgangna og erum leiðandi í stafrænni þjónustu svo eitthvað sé nefnt.

Við erum stolt af því sem vel hefur verið gert, en enn spenntari fyrir því sem við ætlum að gera næst. Við viljum bjóða ungu fólki upp á evrópska mannlífsborg þar sem fólk er í fyrirrúmi og póstnúmerið þitt eða efnahagur foreldra þinna skilgreinir ekki framtíð þína. Í því felst að borgin sé sanngjörn, þjónusta sé aðgengileg og húsnæðisöryggi sé forgangsatriði. En ekki síður að borgin sé skemmtileg, mannlíf og menning blómstri og borgarlandslagið hvetji til samveru. Tækifærin í Reykjavík eiga að vera óþrjótandi og borgin á að iða af lífi utan miðborgarinnar líka!

Þessi framtíðarsýn kallar á forgangsröðun. Í húsnæðismálum ætlum við að byggja um 6000 nýjar íbúðir í Reykjavík næstu fjögur árin og tryggja að húsnæðismarkaðurinn þjóni öllum hópum samfélagsins með því að

styðja áfram við metnaðarfulla uppbyggingu óhagnaðardrifinna húsnæðisfélaga. Undir slíkt húsnæði falla fjölbreyttar lausnir sem nýtast ólíkum hópum, til dæmis ungu fólki, einstæðum foreldrum, lágtekjufólki og háskólanemum.

Við ætlum að þróa 15 mínútna hverfið af festu þar sem allt sem við þurfum í okkar daglega lífi er innan seilingar. Fólk getur þannig ráðstafað tímanum sínum betur og notið borgarinnar - því við ætlum líka að efla mannlíf innan hverfa með því að styðja sérstaklega við uppbyggingu samfélagshúsa, bókasafna, kaffihúsa, veitingastaða og smærri reksturs í hverfunum okkar. Eins ætlum við að bæta aðstöðu fyrir tónleikahald og efna til menningarviðburða um alla borg með því að efla hverfiskjarna sem miðpunkta mannlífs.

Svo eru það sundlaugarnar sem við ætlum að efla með markvissri uppbyggingu, auknu viðhaldi og þjónustu sem mætir þörfum borgarbúa. Eins stefnum við á að bæta aðstöðu við strandlengjuna, Ylströndina og aðra staði sem bjóða upp á einstaka upplifun við sjávarsíðuna, meðal annars fyrir siglingar. En ekki síður vinna markvisst að því að efla  samstarf háskóla og atvinnulífs og auka aðdráttarafl Reykjavíkur fyrir fólk, spennandi hugmyndir og alþjóðleg verkefni.

Það er ótrúlega margt sem okkur langar til að breyta í borginni, og rosalega margt af því veltur á því að rekstur borgarinnar sé góður og skilvirkur, að hver króna nýtist á sem bestan hátt í þjónustu við borgarbúa. Síðan Samfylkingin tók við stjórn landsmála höfum við hrist upp í kerfum sem höfðu staðnað í alltof langan tíma. Nú er kominn tími til að gera það sama hjá Reykjavíkurborg.

Samfylkingin er hlynnt því að miða almennan kosningarétt við 16 ára aldur og vill grípa til markvissra aðgerða til að auka kosninga- og stjórnmálaþátttöku ungs fólks. Við viljum að atkvæði kjósenda alls staðar á landinu vegi jafnt og auka enn frekar beina aðkomu fólks á öllum aldri að stefnumótun og ákvarðanatöku hjá ríki og sveitarfélögum.

Virk þátttaka í frístundum er ein áhrifaríkasta forvörn sem til er. Þess vegna ætlar Samfylkingin að efla félagsstarf fyrir 10 til 12 ára börn og 16 til 18 ára ungmenni, meðal annars með auknum opnunum í félagsmiðstöðvum, sundlaugum og íþróttahúsum. Við ætlum sérstaklega að ná til þeirra sem standa höllum fæti og bjóða börnum og unglingum frá tekjulágum heimilum fulla niðurgreiðslu á einni tómstund að eigin vali. Þá ætlar Samfylkingin að styrkja aðgerðir gegn ofbeldi, einelti og félagslegri einangrun með því að leggja áherslu á fræðslu og samkennd í gegnum félagsmiðstöðvar og frístundastarf.

Við höfum líka talað um aukið samstarf við íþróttahreyfinguna og að tryggja að hún hafi góðan stuðning borgarinnar. Við ætlum þess vegna að efla íþróttafélögin sem lykilaðila í hverfunum þannig að hreyfing og samfélag séu aðgengileg öllum í sínu nærumhverfi. Í því felst að forgangsraða uppbyggingu og viðhaldi íþróttamannvirkja í öllum hverfum með áherslu á bætta aðstöðu fyrir börn og ungmenni. Við ætlum sem dæmi að styðja við fjölbreyttar íþróttagreinar, svo sem hestamennsku, siglingar, og golf, og byggja dans- og varnaríþróttahús í Breiðholti, fimleikahús á Höfðanum og styðja við miðstöð jaðaríþrótta í Toppstöðinni í Elliðaárdal, til að mæta þörfum mismunandi hópa.

Hvað menningarmál varðar viljum við dreifa menningarviðburðum um alla borg, styrkja tónlist með bættri aðstöðu fyrir tónleika, bæta aðstöðu fyrir sviðslistir og veita fleiri börnum tækifæri til tónlistarnáms og annars listnáms.

Samfylkingin styður að sjálfsögðu fjölbreytt búsetuform og áframhaldandi uppbyggingu stúdentaíbúða fyrir háskólanema og heimavista fyrir framhaldsskólanemendur. Með því má jafna aðgengi að námi óháð búsetu og um leið efla líf í hverfum borgarinnar. Við höfum beitt okkur fyrir því í borgarstjórn að Reykjavíkurborg efni til samtals við ríkið um stofnun heimavistar á höfuðborgarsvæðinu í nálægð við framhaldsskóla, svo sem Borgarholtsskóla og Fjölbrautaskólann í Breiðholti, og aðgengilegar almenningssamgöngur í samráði við önnur sveitarfélög.

Opinberir framhaldsskólar eru auðvitað ríkisstofnanir samkvæmt lögum og ber ríkið því ábyrgð á húsnæðismálum þeirra og uppbyggingu og rekstri heimavista. Hins vegar er ekkert því til fyrirstöðu að Reykjavíkurborg styðji við slíkt verkefni og greiði fyrir skipulagsbreytingum og öðrum atriðum sem þurfa að vera til staðar svo hægt sé að ráðast í það.

Þetta er málaflokkur sem skiptir okkur miklu máli. Við teljum að umhverfis- og loftslagsmál eigi að vera leiðarljós í ákvarðanatöku borgarinnar. Því miður upplifum við að þessir málaflokkar hafi fengið minni athygli í umræðunni að undanförnu og að það þurfi að bregðast við því.

Eins og aðrar áherslur okkar þá snúast umhverfis- og loftslagsmál líka um jöfnuð, sérstaklega milli kynslóða. Við stefnum að kolefnishlutleysi fyrir 2030 og að losun borgarinnar dragist saman milli ára með grænni fjárfestingu. Við viljum líka minnka áhrif svifryks á heilsu borgarbúa eins og mögulegt er með því að til dæmis minnka óþarfa notkun nagladekkja í umferðinni í samvinnu við ríkið. Svo viljum við bjóða upp á meira úrval grænmetisrétta og grænkerafæðis í mötuneytum á vegum borgarinnar, sérstaklega í grunnskólum og leikskólum.

Samfylkingin fagnar auknum fjölbreytileika og stefna flokksins er skýr um afdráttarlausa afstöðu gegn hatursorðræðu og annars konar ofbeldi sem ýtir undir hatur og fordóma í garð innflytjenda, hinsegin fólks og annarra þjóðfélagshópa. Það hefur sýnt sig að fræðsla er besta forvörnin gegn fordómum, útskúfun og ofbeldi og þess vegna viljum við auka forvarnir og fræðslu, sér í lagi fyrir börn og unglinga.

Í þessu samhengi leggjum við áherslu á þjónustu við fatlað fólk og fjölskyldur þeirra, fólk af erlendum uppruna og hinsegin fólk. Þetta eru hópar sem oftar en ekki mæta hindrunum í samfélaginu og standa því höllum fæti þegar kemur að aðgengi, þátttöku og tækifærum. Við viljum sérstaklega huga að þörfum og jöfnun aðstöðumunar barna og foreldra í skóla- og frístundastarfi, liðka fyrir náms- og atvinnuþátttöku innflytjenda og auka af krafti íslenskukennslu barna með annað móðurmál en íslensku. Eins viljum við efla hinseginfræðslu í skólum og vinna að því að bæta réttarstöðu hinsegin fólks í samvinnu við félagasamtök þess.

Íslensk stjórnvöld eru nú lögbundin til að virða og framfylgja samningnum í verki og Samfylkingin í Reykjavík bregst við því með skýrum áherslum. Við styðjum hugmyndafræði um sjálfstætt líf og munum beita okkur fyrir nægilegu fjármagni frá ríkinu til að styrkja NPA-þjónustuna. Við ætlum að sjá til þess að borgin veiti fjölbreytta og góða þjónustu í samráði við notendur sem byggir á virðingu og mannréttindum. Við teljum Reykjavíkurborg eiga að koma til móts við þarfir og óskir fatlaðs fólk með því að standa vörð um áframhaldandi uppbyggingu á húsnæði. Auk þess viljum við að borgin sýni fordæmi og bjóði fötluðu og langveiku fólki störf hjá borginni með því að fjölga hlutastörfum.

Þá er það stefna flokksins, hjá ríki og borg, að huga betur að öryggi og vernd fatlaðs fólks og vinna að viðhorfsbreytingu í samfélaginu gagnvart réttindum þeirra og gegn hvers kyns mismunun og fordómum.

Stefna Samfylkingarinnar í geðheilbrigðismálum er að geðheilbrigðisþjónusta sé niðurgreidd og aðgengileg í nærumhverfi hvers og eins, sé það á heilsugæslum eða í menntastofnunum. Samfylkingin í Reykjavík vill hlúa að geðheilsu nemenda með því að fjölga fagfólki, á borð við sálfræðinga og félagsráðgjafa, inni í skólum. Þannig geta börn og unglingar fengið stuðning strax þegar þau glíma við kvíða, depurð, einmanaleika eða eiga erfitt í samskiptum. Við viljum einnig taka upp skimun í upphafi grunnskólagöngu til að finna snemma þau börn sem þurfa á sérstökum stuðningi að halda varðandi nám og líðan. Þá er mikilvægt að greining sé ekki forsenda stuðnings. Til þess að ráðast í slíkar aðgerðir hyggjumst við auka samstarf við háskólasamfélagið um rannsóknir á námi, kennslu og þróun í grunnskólum borgarinnar.

Góður stuðningur við skóla þýðir stuðningur við börn, og börnum sem líður vel læra betur, og það ýtir undir árangur, sem ýtir undir sjálfstraust og öryggi, og svo framvegis. Svo einfalt er það.

Markmið okkar er að það sé auðvelt, öruggt og þægilegt að komast um borgina. Samfylkingin vill bæta samgöngur, stytta ferðatíma, minnka tafir og auka öryggi með því að hrinda samgöngusáttmálanum í heild sinni í framkvæmd - setja Sæbrautarstokk í forgang til að bæta umferðarflæði, flýta undirbúningi á Miklubrautargöngum og tryggja metnaðarfulla uppbyggingu Borgarlínu. Við styðjum samgöngusáttmálann því hann bætir aðstæður fyrir alla hvort sem við heyrum, hjólum eða tökum strætó.

Það væri skaðlegt fyrir Reykjavík ef nýr meirihluti stoppar eða endurskoðar áætlanir sem unnar hafa verið á síðustu árum í samgöngumálum. Það myndi leiða til frekari tafa og meiri kostnaðar og á meðan mun umferðin í Reykjavík halda áfram þyngjast um 70 bíla á viku að meðaltali.

Það er samt líka mikilvægt að við höldum áfram að leggja áherslu á fjölbreyttar samgöngur því mismunandi ferðamátar henta mismunandi fólki. Á meðan Borgarlína byggist upp verður strætó áfram burðarás almenningssamgangna og við viljum bæta þjónustu hans áfram með fleiri forgangsakreinum, betra aðgengi, bættu leiðakerfi og aukinni tíðni um helgar. Eins ætlum við að gera borgina gönguvænni með göngustígum og -götum, öruggum framkvæmdum og samfelldum hjólastígum til að tengja hverfi borgarinnar betur saman.