Menningarmál, húsnæðismál, umhverfismál, lýðheilsu og gagnsæja stjórnsýslu.

Skapa opin menningar- og samverurými; samfélagshöfn þar sem íbúar, listafólk og frumkvöðlar skapa saman lifandi vettvang fyrir listir, menningu og nýsköpun. Sjá til þess að íþróttaiðkun sé efld og akstur. Öflugt og fjölbreytt atvinnulíf er grunnur að blómlegu samfélagi. Til að styrkja það í Borgarbyggð þarf að horfa gagnrýnið á hvað vantar, hvort sem það er aðgengi að fjármagni, sérhæfðu vinnuafli, innviðum eða hvötum til nýsköpunar. Borgarbyggðarlistinn vill skapa betri skilyrði með skýru regluverki, skilvirkri þjónustu og virku samtali við atvinnulífið. Jafnframt þarf að efla nýsköpun, styðja við lítil fyrirtæki, bæta innviði og laða að fjölbreyttari störf. Markmiðið er ekki aðeins að styrkja núverandi atvinnulíf, heldur byggja upp fjölbreyttara og framtíðarhæft samfélag.

Málefnaleg umræða um lækkun kosningaaldurs hefur enn ekki farið fram innan okkar hreyfingar sem er tiltölulega ný. Það er mikilvægt að taka slíkt mál til vandlegrar skoðunar og byggja afstöðu á traustum rökum og breiðri umræðu. Á sama tíma er ástæða til að horfa jákvætt til aukinnar þátttöku ungs fólks í lýðræðinu. Með því að opna fyrir frekari aðkomu þeirra má styrkja tengsl nýrra kynslóða við samfélagið og auka fjölbreytni sjónarmiða í ákvarðanatöku.

Við viljum áfram leggja áherslu á að Borgarbyggð sé heilsueflandi samfélag sem á við okkur öll sem búum hér. Sveitarfélagið þarf að styðja við íþróttastarfsemi og vera í nánari samstarfi við félögin sem hér starfa. Sveitarfélagið þarf að skoða með hvaða leiðum það getur best stutt við íþróttafélögin með samtali við íþróttafélögin. Til að mynda viljum við að unnið verði í því að endurvekja upp skátastarf. Við viljum leggja áherslu á inngildingu og lýðheilsu þannig að allt fólk eigi kost á að iðka tómstundir og íþróttir eftir áhuga og getu. Áframhaldandi uppbygging íþróttahúss í Borgarnesi og auka opnunartíma í sundlaugum á Varmalandi og Kleppjárnsreykjum.

Við viljum styrkja framhaldsskólana á svæðinu með því að bæta aðgengi og aðstæður nemenda, sérstaklega þeirra sem búa í dreifbýli. Mikilvægur liður í því er uppbygging heimavistar sem nú er í farvatninu, sem mun auðvelda nemendum að sækja nám án þess að þurfa að flytja langt að heiman.

Jafnframt viljum við nýta tómstundarútuna betur þannig að hún þjóni einnig framhaldsskólanemum og tryggi þeim öruggar og hagkvæmar samgöngur. Með þessu er verið að efla menntun í heimabyggð og skapa raunhæfan valkost fyrir ungt fólk til að stunda nám án þess að rjúfa tengsl við sitt nærumhverfi.

Borgarbyggðarlistinn vill ekki að byggðar verði vindmyllur í sveitarfélaginu. Við leggjum ríka áherslu á að halda umhverfinu snyrtilegu og gróðri vel við haldið. Við viljum einfalda sorphirðu og draga úr kostnaði, m.a. með því að leggja áherslu á sjálfbærni í umhverfismálum. Það mætti skoða leiðir við moltugerð í heimahúsum, fræða fólk um flokkun og endurvinnslu, koma upp fleiri grenndargámum og hvetja til aðhalds í umbúðanotkun og neyslu. Með bættri flokkun fást hærri endurgreiðslur úr úrvinnslusjóði sem leiðir til þess að íbúar þurfa að greiða minna fyrir sorphirðu. Við viljum skoða þann möguleika að úthýsa ekki sorpþjónustu heldur reka hana innan sveitarfélagsins, draga þannig mögulega úr kostnaði en ekki skerða þjónustu.

Okkur finnst að öll sem búa í Borgarbyggð eigi að geta notið þess að vera þau sem þau eru. Fjölbreytileiki er ekki áskorun heldur styrkur sem eflir samfélagið í heild. Við viljum leggja áherslu á þjónustu sem mætir öllum, óháð uppruna, menningu, kynhneigð, fötlun eða félagslegri stöðu og tryggir að allir hafi raunhæfan aðgang og tækifæri til þátttöku. Við viljum jafnframt vinna með fyrirtækjum og stofnunum að því að efla vitund og sjálfsmeðvitund um fordóma og mismunun og hvetja til þess að þau tileinki sér verklag og aðgerðir sem stuðla að inngildingu í daglegu starfi. Slíkt felur ekki aðeins í sér fræðslu heldur einnig ábyrgð á því hvernig við komum fram hvert við annað og hvernig við mótum vinnustaði og þjónustu. Fjölmenningarleg fræðsla er mikilvægt tæki í þessu samhengi, ekki sem einstakt verkefni heldur sem stöðugt ferli þar sem fólk fær tækifæri til að læra hvert af öðru, auka skilning og styrkja tengsl. Með því að byggja upp slíkt samfélag verður Borgarbyggð staður þar sem fjölbreytileiki fær að blómstra og allir geta upplifað sig velkomna. Við viljum efla samstarf við Samtökin ‘78 með það að markmiði að auka fræðslu, vitund og inngildingu í samfélaginu. Jafnframt viljum við endurskoða húsnæðisaðstöðu Öldunnar (félagsþjónustu fatlaðra) og kanna möguleika á að færa starfsemina nær grunnþjónustu, til að bæta aðgengi og styðja við aukna þátttöku notenda í samfélaginu.

Lögfesting samnings sameinuðu þjóðana um réttindi fatlaðs fólks byggist fyrst og fremst á því að styrkja mannréttindi fatlaðs fólks og tryggja að fatlað fólk njóti til fulls allra mannréttinda og geti tekið virkan þátt í samfélaginu til jafns við aðra. Markmið samningsins er að efla, verja og tryggja full og jöfn mannréttindi og grundvallarfrelsi fyrir allt fatlað fólk til jafns við aðra, ásamt því að efla og vinna að virðingu fyrir eðlislægri reisn þess. Við teljum mikilvægt að sveitarfélagið standi vörð um að samningi sameinuðu þjóðana um réttindi fatlaðs fólk sé fylgt eftir sem og hann sé notaður sem leiðarvísir þegar kemur að mótun þjónustu við fatlað fólk. Þjónusta við fatlað fólk ætti fyrst og fremst að byggjast á notendasamráði, virðingu, aðgengi að þjónustu og tækifærum til menntunar og félagslegrar þátttöku jafnt við aðra í sveitarfélaginu. Við teljum sveitarfélagið bera ábyrgð á því að koma til móts við þarfir hvers og eins og að fatlað fólk fá tækifæri til að taka virkan þátt í mótun þjónustu Borgarbyggðar við fatlað fólk.

Við viljum efla geðheilbrigði með því að styrkja félagsleg tengsl, meðal annars með virku félags-, tómstunda- og menningarlífi fyrir alla aldurshópa. Einangrun er einn stærsti áhættuþáttur geðræns vanda og því er samfélagsleg þátttaka ekki jaðarmál heldur kjarni geðheilbrigðis. Inngilding og aðgengi að íslensku eru einnig grundvallarþættir í geðheilbrigði. Að tilheyra samfélagi, skilja það og geta tjáð sig innan þess er forsenda öryggis, sjálfsmyndar og virkrar þátttöku. Skortur á tungumáli eða útilokun frá samfélagi getur leitt til einangrunar, valdaleysis og aukins andlegs álags. Þess vegna eru inngilding og tungumál ekki aðeins mennta- eða félagsmál, heldur beinlínis geðheilbrigðismál.

Stefna okkar leggur áherslu á að takast á við rót vandans með því að fyrirbyggja slíka þætti áður en þeir þróast í alvarlegan vanda og álag á kerfið, til dæmis í formi langra biðlista. Við viljum auka aðgengi að sálfræðingum og teljum mikilvægt að Sjúkratryggingar og sálfræðingar geri samninga sín á milli til að lækka kostnað (ef við mættum ráða en ekki ríkið). Jafnframt þarf að bæta aðgengi að geðlæknum og stytta biðlista svo þjónustan sé ekki aðeins raunhæfur kostur fyrir efnameiri hópa. Einnig viljum við auka aðgengi að sálfræðiþjónustu á landsbyggðinni með stuðningi ríkisins, þannig að íbúar þar njóti sambærilegrar þjónustu og íbúar á höfuðborgarsvæðinu.

Borgarbyggðarlistinn vill efla almenningssamgöngur í sveitarfélaginu með það að markmiði að draga úr kolefnisspori, bæta aðgengi og auka öryggi íbúa. Góðar og áreiðanlegar samgöngur eru ekki aðeins umhverfismál heldur einnig mikilvægt lýðheilsu- og jafnréttismál, þar sem þær skapa fleiri tækifæri til þátttöku í daglegu lífi, óháð búsetu eða aðstæðum. Þá leggjum við áherslu á að vegir í umsjá sveitarfélagsins, þar sem það á við, séu vel við haldnir allt árið. Öruggar samgöngur eru grundvallaratriði í daglegu lífi og þar þarf að hafa skýra sýn. Við styðjum svokallaða „núllsýn“, að engin banaslys verði í umferðinni. Slík sýn krefst markvissra aðgerða, bæði í uppbyggingu innviða og í daglegu viðhaldi. Umferðarslys hafa ekki aðeins mikinn fjárhagslegan kostnað, heldur fyrst og fremst djúpstæð áhrif á líf og líðan fólks. Með því að efla almenningssamgöngur og tryggja örugga og vel viðhaldna vegi er hægt að taka raunhæf skref í átt að öruggara, sjálfbærara og mannvænna samfélagi.