Við ætlum að gera Skagafjörð skemmtilegri. Það er gott að búa í Skagafirði en við getum gert enn betur varðandi viðburði og aðstöðu til mannamóta. Við viljum búa til samfélag þar sem unga fólkið vill búa og flytja til baka að námi loknu. Þá þarf að vera fjölbreytt framboð af tómstundum, öflugt menningarlíf, bæjarhátíðir, kaffihús, verslanir og góð þjónusta. Ekki má gleyma öflugu íþróttastarfi fyrir alla. Það er þannig samfélag sem fólk vill búa í og við teljum að kosningarnar muni snúast um það hver hefur raunhæfa sýn á það hvernig það er gert.

Við sjáum mikil tækifæri í komu Háskóla Íslands í Skagafjörð. Við viljum byggja upp öflugt skólasamfélag sem iðar af lífi. Einmitt það gerist þegar skólastarf eykst og við fáum fjöldann allan af nemendum í okkar góða samfélag. Þá viljum við styðja við viðburði þar sem framhaldsskólanema, háskólanemar og íbúar koma saman í leik og starfi.

Við sjáum mikil tækifæri í því að samræma aldur varðandi bílpróf, kosningar, áfengiskaupaaldur o.fl. Þegar fólk verður fullorðið þá á það bara að geta gert þetta allt saman.

Eitt af okkar stærstu málum er að hefja undirbúning á bættri íþróttaraðstöðu á Sauðárkróki með stækkun á íþróttaraðstöðu á Sauðárkróki. Við viljum greina þarfir mismunandi hópa hvernig slíkt mannvirki getur þjónað sem flestum. Einnig viljum við byggja upphitunaraðstöðu við reiðhöllina á Sauðárkróki til að bæta aðstöðu hestamanna. VIð viljum bjóða íbúum Skagafjarðar uppá Lýðheilsukort að fyrirmynd Akureyrar, þar sem fjölskyldur greiða eitt gjald sem veitir þeim aðgang að sundi, skíðum, söfnum og mögulega fleiru eins og golfi. Þá viljum við auka opnunartíma í sundlaugum Skagafjarðar og leitast við að lækka kostnað barna við íþróttaiðkun.

Það er forgangsmál að pressa á ríkið að hefja uppbyggingu á stækkun verknámshúss við FNV. Aðstaðan þar  er ekki boðleg og hana þarf að bæta. Jafnframt sjáum við mikil tækifræi í að tengja betur saman FNV við Háskólann og jafnframt tengja þau betur við atvinnulífið. Við viljum að hér rýsi þekkingargarðar þar sem menntasamfélagið vinnur saman með atvinnulífinu og skapar þannig ný og spennandi störf.

Við viljum að Skagafjörður verði fyrirmyndar sveitarfélag í umhverfismálum og að sveitarfélagið leiði með góðu fordæmi í rekstri, innkaupum og skipulagi, með áherslu á sjálfbærni og ábyrgð.

Við viljum sjá fleiri hleðslustöðvar um allan Skagafjörð svo rafbílavæðing verði raunhæfur kostur fyrir alla.

Við viljum auka áherslu á hjólreiðar með betri stígum og aðstöðu, bæði fyrir daglegar ferðir og útivist.

Jafnframt viljum við viðhalda og fylgja eftir loftslagsstefnu sveitarfélagsins með mælanlegum aðgerðum og reglulegu eftirfylgni.

Afstaða okkar er skýr þegar kemur að inngildingu. Við viljum að Skagafjörður sé samfélag þar sem allir eru velkomnir óháð uppruna og þar sem hver og einn fær tækifæri til að taka virkan þátt. Við þurfum á öllum að halda og það er lykilatriði að virkja nýja íbúa sem mikilvægan hluta af okkar góða samfélagi.

Við leggjum áherslu á að efla íslenskukennslu í samstarfi við Farskólann þannig að fleiri geti tekið virkan þátt í samfélaginu og atvinnulífinu. Jafnframt viljum við tryggja að efni frá sveitarfélaginu sé aðgengilegt á fleiri tungumálum svo upplýsingar nái til allra íbúa.

Við viljum einnig eiga virkt samtal við íþróttafélög og önnur áhugamannafélög um markvisst átak til að auka þátttöku erlendra ríkisborgara. Með því styrkjum við tengsl milli fólks, aukum samheldni og gerum samfélagið okkar enn öflugra og fjölbreyttara.

Við munum vinna markvisst að því að aðlaga þjónustu sveitarfélagsins að kröfum samningsins þannig að hún sé aðgengileg, sveigjanleg og miðuð að þörfum hvers og eins. Sérstök áhersla verður lögð á að bæta aðgengi að opinberum byggingum og upplýsingum, styrkja stoðþjónustu og tryggja að fatlað fólk hafi raunveruleg tækifæri til þátttöku í samfélaginu, hvort sem er í námi, starfi, íþróttum eða félagslífi.

Við viljum jafnframt eiga virkt samtal við fatlað fólk og hagsmunasamtök þeirra þannig að ákvarðanir séu teknar í samráði við þá sem málið varðar. Markmiðið er að Skagafjörður verði samfélag þar sem allir hafa jafna möguleika til að lifa sjálfstæðu og virku lífi.

Við viljum efla geðheilbrigði í samfélaginu með því að setja aukna áherslu á fræðslu og opna umræðu. Mikilvægt er að draga úr fordómum og auka skilning á geðheilsu þannig að fleiri treysti sér til að leita sér aðstoðar þegar þörf er á.

Við ætlum að tryggja að íbúar viti hvert hægt er að leita eftir hjálp við geðheilbrigðistengdar áskoranir með skýrum upplýsingum og betra aðgengi að þjónustu. Með því viljum við stuðla að því að enginn standi einn og að allir hafi raunverulegan möguleika á að fá stuðning þegar á þarf að halda.

Staða samgangna í Skagafirði er víða óviðunandi og við ætlum að setja mun meiri þunga í að knýja fram úrbætur. Samgöngur eru lífæð samfélagsins og forsenda þess að daglegt líf, atvinnulíf og þjónusta gangi upp.

Við viljum setja aukna pressu á ríkið og Vegagerðin um að auka fjármagn verulega til svæðisins þannig að hægt sé að fara í nauðsynlegar framkvæmdir. Sérstök áhersla verður á öryggi barna sem þurfa daglega að ferðast um vegi sem eru ekki í viðunandi ástandi.

Jafnframt viljum við endurskoða fyrirkomulag snjómoksturs um allan fjörðinn með það að markmiði að bæta þjónustu, auka öryggi og tryggja að fólk komist leiðar sinnar, bæði til vinnu og skóla.